Мақсаты: Тәрбиеленушілерге мерекелік  көңіл күй сыйлау. Әсем безендірілген шырша арқылы әдемілікті ұғындыру. Аяз атаның, Ақшақардың, карнавалдық киімдерінің ерекшеліктерін сезіндіру арқылы қоршаған ортаға қызығушылықтарын арттыру. Көңілді ойындар ойнату,  бір-бірлерімен достық қарым-қатынасты ояту.

«Атамекен» отбасы үлгісіндегі балалар ауылының тәрбиеленушілерінің  «Hayat Palace»  мейрамханасында  «Төрлет, құтты Жаңа жыл!» атты шырша мерекесі  тойланды. Мерекелік кеш,  балалар ауылының тәрбиеленушілерінің  орындауындағы «Ғажайып түс» қойылымымен басталды. Бұдан соң, «Жаңа жыл» әнінің ырғағымен барлық отбасының ана тәрбиешілері тәрбиеленушілерімен бірге ортаға  шықты.  Қызылорда облыстық білім басқарма басшысының орынбасары – Қасымова Ақзира Бақтыбайқызы көрермендер мен тәрбиеленушілерді жаңа жылдық мерекемен құттықтап, әр баланың  жүрегіне  жылылық ұялатты.  Сонымен қатар,  «Атамекен» балалар ауылының  тәрбиеленушілерінің  қамқоршылары, жомарт жүрек тұрақты  демеушілеріміз  балаларды мерекемен құттықтай отырып  жаңа жылдық  тәттілер   сыйлады. Балалар  болса жаңа жылдық көңілді әндер шырқап, флешмоб, би  билеп, қызықты қойылымдар қойды, Аяз Ата мен Ақшақарды қарсы алып ойындар ойнап,  ерекше қуанышты көңіл күйде болды.  Кеш соңында «Атамекен» отбасы үлгісіндегі балалар ауылының директоры Скакова Лиза Ногаевна  келген қонақтарды мерекемен құттықтай келе, шексіз  алғысын  білдірді. Жаңа жыл – әлемдегі қуанышқа толы ең ғажайып мерекелердің бірі.  Біз бәріміз жаңа жылдан  жарқын ертегі, жаңа бақыт күтеміз. Лайым солай болғай!